Rhestr o Awduron

JONES, CERI WYN

Bro Dirion, Maes–y–dderwen, Heol Gwbert, Aberteifi SA43 1PE
Ffôn: 01239 612044 (gartre) neu 01559 363090 (gwaith)
Ebost: ceri.catrin@:virgin.net neu ceri@gomer.co.uk

Crwt o Aberteifi yw’r Prifardd Ceri Wyn Jones.  Ond fe’i ganed yn Welwyn Garden City, Swydd Hertford.

Enillodd Gadair yr Eisteddfod Genedlaethol ym 1997 am ei awdl Gwaddol, ac mae’n llais a wyneb cyfarwydd ym myd y talwrn a’r ymryson a thu hwnt.  Mae’n teithio ar hyd a lled y wlad yn cynnal gweithdai i blant ac athrawon, yn darlithio a darlledu, ac yn perfformio ei waith.  Bellach hefyd, mae ei gerddi yn cael eu hastudio ar gyrsiau Cymraeg TGAU, Lefel ‘A’ a Gradd.

Fe’i magwyd ym Mhen y Bryn (gogledd Sir Benfro) a chafodd ei addysg gynradd yn ysgolion Cilgerran ac Aberteifi.  O Ysgol Uwchradd Aberteifi, fe aeth wedyn i’r Brifysgol yn Aberystwyth lle enillodd radd mewn Saesneg.

Yn 17 oed, dysgodd y cynganeddion yn nosbarthiadau’r Prifardd T. Llew Jones ond eu hesgeuluso’n enbyd hyd nes iddo ennill Cadair yr Eisteddfod Ryng-golegol ym 1990 a Chadair Eisteddfod Genedlaethol yr Urdd ym 1992.

Mae’n aelod o dîm Y Taeogion ar raglen radio Y Talwrn ac o dîm Sir Gâr yn Ymryson y Beirdd yr Eisteddfod Genedlaethol bob blwyddyn.  Mae hefyd yn un o golofnwyr sefydlog Barddas a’r Cardigan and Tivy-side Advertiser (neu’r Teifi-seid ar lafar gwlad!)

Gyda’i gyd-Daeogion, Tudur Dylan Jones ac Emyr Davies, mae’n cynnal nosweithiau barddol poblogaidd ledled y wlad; nosweithiau sy’n cyfuno llond bol o chwerthin gydag ambell ysbaid mwy dwys.

Ef oedd Bardd Plant Cymru 2003-04 ac yn sgîl y gweithgarwch hwn, cyhoeddodd gyfrol o gerddi i blant, sef Dwli o Ddifri a gyrhaeddodd Rhestr Fer Gwobr tir Na-n Og.  Yn yr un flwyddyn, bu’n un o gyd-awduron Byd Llawn Hud, sef y llyfr a enillodd y wobr honno!  Yn 2004 hefyd, ef oedd Bardd Preswyl yr Eisteddfod Genedlaethol.  Yn 2005, bu’n un o feirdd comisiwn Yr ¯yl Gerdd Dant.  Roedd yn un o feirniaid y Gadair yn yr Eisteddfod Genedlaethol yn Abertawe yn 2006.

Ym Mawrth 2007, ef oedd awdur geiriau cân fuddugol Cân i Gymru, sef Blwyddyn Mâs, a ganwyd ac a gyfansoddwyd gan Einir Dafydd.

Mae ei gyfol gyntaf o gerddi, Dauwynebog (Gomer, 2007), ar Restr Hir Llyfr y Flwyddyn 2008.  Ewch yma i ddarllen mwy. 

Wedi dros ddegawd fel Pennaeth Adran Saesneg Ysgol Dyffryn Teifi, ers 2002 mae’n Olygydd Llyfrau Saesneg gyda Gwasg Gomer yn Llandysul, ac yn ei amser hamdden, yr ychydig brin sydd ganddo, mae’n canu gyda chorau Ar Ôl Tri a Cywair.

Yn Dauwynebog, mae’r bardd yn archwilio’r gwrthdaro parhaus rhwng y mewnol a’r allanol, rhwng gweledigaeth ddyrchafol y galon a rheswm didostur yr ymennydd, a rhwng y dweud a’r gwneud.  Dyma gyfrol sy’n llawn deuoliaeth a gwrthgyfrerbyniadau trawiadol, o fewn cerddi unigol a rhwng y cerddi hynny.

Cliciwch ar y clawr i brynu copi

Detholiad o gyhoeddiadau:

I oedolion:
Dauwynebog (Gomer, 2007)

Cyfraniadau i flodeugerddi amrywiol, megis Blodeugerdd Barddas o Farddoniaeth Gyfoes a chyfresi Cywyddau Cyhoeddus (Carreg Gwalch), Talwrn y Beirdd (Gwasg Gwynedd) a Cerddi Fan Hyn (Gomer), ynghyd â Hoff Gerddi Nadolig Cymru a Hoff Gerddi Digri Cymru (Gomer).

I blant:
Dwli o Ddifri (Gomer 2004)

Cyfraniadau i:
Byd Llawn Hud (Gomer 2004)
Gwlad y Dreigiau (Gomer 2004)
Caneuon y Coridorau (Carreg Gwalch 2005)
Nadolig y Plant (Carreg Gwalch 2005)
Plentyn (Y Dref Wen 2006)
Ar Hyd y Flwyddyn (Gomer 2007)

Addasiadau:
Barti a Bel yn Crwydro Cymru (Gomer 2003)
Barti a Bel Ar Goll mewn Llyfr (Gomer 2006)

Sylwadau Beirniadol:

“Dyma fardd mawr a gyflawnodd gamp anghyffredin”
James Nicholas ym meirniadaeth lwyfan cystadleuaeth y Gadair yn Eisteddfod Genedlaethol Meirion a’r Cyffiniau, 1997

“O safbwynt crefft, y mae [Ceri Wyn Jones] yn gynganeddwr penigamp. Mae ei linellau’n pefrio gan newydd-deb ymadrodd a gellir dweud hefyd ei fod yn llwyddo i ddad-farddoni arddull yr awdl eisteddfodol draddodiadol, gan agor ffenestri a chreu newydd-deb ymadrodd cyffrous. Anadlodd fywyd newydd i hen gyfrwng. Nid yw’n ormod dweud iddo agor llwybrau newydd a phosibiliadau disglair i’r awdl yn y ganrif nesaf. Dyma waith pencerdd yn wir.”
 James Nicholas (Cyfansoddiadau a Beirniadaethau Meirion a’r Cyffiniau)

“Meistr ar gerdd dafod.”
 Ieuan Wyn (Cyfansoddiadau a Beirniadaethau Meirion a’r Cyffiniau)

“Bron na ellid dweud mai’r gynghanedd, yn hytrach na’r Gymraeg, yw ei iaith gyntaf gan mor reddfol yw ei feistrolaeth ohoni… Gall y sawl a fynn, ’rwy’n siwr, dwrio o dan y geiriau a chanfod yno ‘storws o ystyron’. Ond mae’n well gen i aros yn ôl, i synhwyro’r darlun yn ei holl dristwch tywyll gan ryfeddu at y ddawn a’i creodd.”
 Idris Reynolds (Cyfansoddiadau a Beirniadaethau Meirion a’r Cyffiniau)

"Dyma un o’r awdlau gorau ers degawdau."
 Meirion Macintyre Huws (Golwg)

"Nid fy mwriad yw ceisio dwyfoli Ceri Wyn ond mae yna rywbeth dwyfol yn perthyn i’w ddawn ryfeddol. Cyflawnodd gampwaith."
 Vaughan Hughes (Barn)

“Bob tro mae’n llwyddo i fynd o dan groen profiad cyffredin i ddod ag arwyddocâd oesol i’n hysgwyd.”
 Aled Lewis Evans (Barddas)

"Rwy’ di clywed sôn ers tipyn bod Ceri Wyn ar fin cyhoeddi cyfrol. Ydy hyn yn wir? A phryd? Rwy’n ysu i gael fy mhig rhwng ei chloriau – ma ’na gymaint o sdwff gwych gan cwj dros y blynyddoedd."
 Annedd y Cynganeddwyr

"Bring it on! Byse fe’n gyfrol a hanner."
 Annedd y Cynganeddwyr

Adborth i Weithdai Barddoniaeth mewn Ysgolion Cynradd:

"Cafodd blwyddyn chwech ddiwrnod arbennig yn nghwmni Ceri. Gwn y bydd ei ddylanwad yn dangos yn eu hysgrifennu nid yn unig nawr ond yn y dyfodol. Mae’r profiadau hyn mor bwysig iddynt."
Mair Robbins (Pennaeth Ysgol Melin Gruffudd)

"Bu’r sesiwn yn llwyddiant mawr o’n rhan ni.  Roedd y plant yn byrlymu o syniadau, ac yn gyffro i gyd o weithio yn erbyn y cloc. Roedd cael adborth yn syth gan Ceri Wyn Jones yn ysbrydoli’r plant ac yn eu hysgogi i wella’u gwaith.  Roedd gan CWJ ffordd hyfryd o wneud ei sylwadau ar waith y plant ac roeddent wrth eu boddau pan gyfeiriodd Bardd Plant Cymru atynt fel beirdd! Hyderaf y bydd hwn yn symbylu’r plant i fynd ati i ysgrifennu cerddi yn eu hamser sbar.  Gobeithiaf y gallwn fanteisio ar unrhyw sesiynnau tebyg eto os bydd y cyfle’n codi."
Aled Rees (Athro yn Ysgol Tyle’r Ynn)

"Cafodd plant Blwyddyn 5 brofiad gwych o gydweithio â’r bardd Ceri Wyn Jones. Llwyddodd y plant i gyfansoddi cwpledi doniol yn ei gwmni a bu’r ymweliad yn sbardun ar gyfer darllen a mwynhau barddoniaeth! Erbyn hyn, llyfr mwyaf poblogaidd y dosbarth yw llyfr newydd o gerddi Ceri Wyn Jones!!"
 Colofn Ysgol Bro Eirwg yn Y Dinesydd

"Ceri Wyn yn ffantastig gyda’r plant."
Delyth Humphreys (Cyngor Llyfrau Cymru)

"Roedd yr ysgolion wedi gwirioni ac yr oedd ymateb y plant yn siarad drosto’i hun."
Eirlys Eckley (Athrawes Ymgynghorol)

Pynciau sy’n gymwys dan y cynllun Awduron ar Daith:

1. Darllen/trafod ei waith ei hun
2. Cynnal gweithdai ysgrifennu barddoniaeth
3. Cynnal gweithdai hyfforddiant i athrawon
4. Darlithio ar farddoniaeth a llenyddiaeth
5. Cynnal noswethiau barddoniaeth boblogaidd ar y cyd â Tudur Dylan Jones ac Emyr Davies

Oedran y Gynulleidfa:

O blant bwyddyn 5 i fyny ac i oedolion o bob oedran!